De gemeenteroad van Riessen-Holten verdeent ’n pluuumke. Woarum? Umdat zee al viefteen joar ’t veur meka krig um eens in ’t joar nen roadsvergadering in de streektaal te hoalden. Alle joar mut dat veniejs wödden annevroagd en alle joar gef dat weer ne hele disseleriej in ’t presidium.
Dat presidium besteet oet de fractieveurzitters van de partiejen in ’n road en ’n roadsgriffier en regelt alns roond um ’n gemeenteroad.
’t Steet de roadsleden vriej um wal of nit in ’t plat te proaten, sommigen könt ’t nit en mut dat dan ok nit proberen, mar ’n fleenk antal döt mooi met. Ok oaver heel serieuze zaken geet dat heel best. ’t Blik da’j oe heel good en dudelijk könt oetdrukken zoonder dat ’t op ’n toneelstuk geet lieken.
De ingedeende moties en vroagen in ’t plat wörden ok in ’t plat opsteld.
Riessen- Holten is de enige gemeente in Twente dee zonne roadsvegadering in de streektaal hoaldt. In aandere plaatsen bint wal eens pogingen doan, mar dat hef niks opleaverd. Jammer, want dit soort andacht veur oonze streektaal is heel belangriek en hard neudig, veural ok noar de jeugd hen. Doarum was ’t in Riessen zo mooi dat zeker veer van de platproaters in ’n road jonge leu waren.
Wiej hebt in oonzen schrieversmiddag, den wiej eens in ’t joar hoaldt, wethoalder Bert Tijhof en Jan Berkhoff, beide van de CU, oetneudigd en evven lof toozwaaid. Zee hebt namelijk, as CU, zich al dee joaren inzat veur dat plat in ’n road, mar doarnoast ok eer verkiezingsprogramma veur de ofgelopen landelijke verkiezingen, samen met oons lid en schriever Martin Ter Denge, in het Twents vertaald en oetgeven. Nooit eerder van heurd.
Namens ’n Kreenk heb wiej ze doar veur daank zeg. Dik Verdeend.
Bovenstaand artikel is geschreven door Joop Weber, voorzitter van 'Kreenk vuur de Twentse Sproak' en gepubliceerd in 'Niejen Bodbreef'.