Beste inwoner van de gemeente Deutekem,
Deutekem is ‘n gemeente um van te hollen! I-j woont in ’n hele mooie stad met volop kansen. Dag in, dag uut zet onze lokale politici zich in um disse plaats nog mooier te maken. De gemeente wödt bestuurd deur gemeenteraodsleden, wetholders en de burgemeester. Op woensdag 16 meert 2022 bunt d’r gemeenteraodsverkiezingen. Dan is ‘t an ow um te bepaolen wie d’r in de gemeenteraod mag kommen um ow geluud te laoten heuren. In de afgelopen vier jaor he’w laoten zien dat de VVD ‘t verschil mik veur onze mooie gemeente. Denk hierbi-j an de stimulering van de woningbouw, de invulling van ‘t A18 - bedrievenpark en de verbreding van de Europaweg. In dit verkiezingsprogramma kö’j per onderwerp laezen wat de VVD Deutekem hiervan vindt.
Belangriek veur de VVD Deutekem is ‘t volgende: ‘n Gemeente die klaor steet veur de inwoners De VVD wil ‘n gemeente die werkt veur ow. Met ‘n fijne woon-umgeving die veileg is, met genog gruun en veurzieningen in de buurt. ‘n Gemeente die regelt dat de straoten schoon bunt en zonder wateraoverlast, dat kinderen veileg naor school könt en waor a’j dichte bi-j huus op liefdevolle zorg könt rekkenen. Dat onze gemeente ‘n fijne plaats wödt en blif wao’j fijn könt wonen, werken en laeven. Goed en betaalbaor wonen Of i-j now alleen woont in Aoverstegen, samenwoont met ow partner op De Veentjes of met kinderen ‘n huus met tuin hebt in De Huet: de woningnood in Deutekem is hoog en ‘t ende liekt nog niet in zich. As VVD Deutekem wille wi-j dat d’r minimaal 500 ni-je huzen per jaor bi-j-ebouwd gaot wodden, zodat iedereen betaalbaor in onze gemeente kan (blieven) wonen. Wi-j geeft veurrang an betaalbaore koop- en huurwoningen. Daornaost vinne wi-j dat elke Deutekemmer dén hier wil blieven wonen, of weerkommen nao ‘n studie, die gelaegenheid mot hemmen. Woningbouw hef daorum de kommende periode de hoogste prioriteit veur de VVD Deutekem.
‘n Blujende lokale econemie De VVD wil dat d’r in Deutekem meer banen bi-j komt. Want ‘n baan is zovölle meer dan ‘n inkommen. ‘t Is ‘t gevuul da’j bi-jdraagt an de samenlaeving en ‘t zorgt veur contact met fijne collega’s. Daorumme wille wi-j dat iedereen in Deutekem met kan doen. Ondernemmers heurt genog ruumte te kriegen um an de slag te können. Juust de lokale bedrieven hebt ‘n moeileke tied achter de rug. Wi-j wilt niet dat ze van ‘t kasje naor de muur gestuurd wodt. Wi-j geeft eur vlot en dudelek antwoord op vraogen via ‘t ondernemmersloket en denkt met aover de beste oplossing.
‘n Veileg thuus en ‘n veilege buurte In Deutekem wille wi-j da’j fijn könt laeven. Dit betekent andach veur ‘n grune umgeving en genog meugelekheden um ow vri-je tied te besteden, bi-jveurbeeld in en rondum De Zumpe, De Greephorst, De Kruisbargse Bossen en de Slangenburg. Fijn laeven betekent ók veileg laeven. As VVD maken wi-j verkeersituaties in onze gemeente weer veileg veur voetganger, fiets en auto en zorgen wi-j veur ‘n soepele deurstreuming. Denk daorbi-j an plekken as ‘t bedrieventerrein De Huet –Energieweg en Verheulsweide. Zo kommen wi-j veileg en op tied an bi-j werk, school of bi-j femilie. Vernemsteg en duurzaam gruun As ‘t geet um energie mot Deutekem wieter verduurzamen. Huzen gaot van ‘t gas af, zonneparken en windmöllen verschient in ons landschap. Dat vrög um vernemstege keuzes. De VVD Deutekem wil dat verduurzaming betaalbaor blif veur gewone gezinnen en ondernemmers. Verrommeling van ‘t landschap willen wi-j tegengaon en draagvlak onder Deutekemers vinnen wi-j heel belangriek. Zo zorge wi-j d’r veur da’w klaor bunt veur de toekomst en onze stad schoon en laefbaor holt.
Verstandege financiële keuzes As de gemeente meer uutgif dan d’r binnenkump kommen der op tied van duur problemen. Daorum letten wi-j goed op onze gemeenteleke schatkist. Wi-j holt de lokale lasten laeg deur de gemeenteleke taken op ‘n zunege, maor effectieve menier uut te voeren. En as de gemeente geld aover hölt, zorge wi-j dat dit terechte kump bi-j onze inwoners en ondernemmers. Zo hollen wi-j ‘t laeven in Deutekem veur iedereen betaalbaor. De VVD Deutekem is veur ow goed bereikbaor. Mocht i-j aover dit programma iets met ons willen delen of vraogen, dan kö’j via Facebook, Instagram of Twitter contact met ons opnemmen.
Hans Dales Liesttrekker VVD Deutekem